سری ساکک: ئیسرائیل 10 کیلۆمەتر لە دیمەشقەوە دوورە و ئەمان دەیانەوێت کورد کۆمەڵکوژ بکەن
پەرلەمانتارێکی دەم پارتی لەبارەی هێرشەکانی سەر حەلەب رایدەگەیێنێت کە ئیسرائیل گەیشتووەتە دووریی 10 کیلۆمەتری دیمەشق، بەڵام ئەوانەی فیشەکێکیشیان بە ئیسرائیلەوە نەناوە، دەیانەوێت ئەو کوردانە کۆمەڵکوژ بکەن کە پەنایان بۆ شێخ مەقسوود و ئەشرەفییە بردووە.
پەیامی سری ساکک لەسەر تۆڕی ئێکس
سری ساکک، پەرلەمانتاری پارتی یەکسانی و دیموکراتیی گەلان (دەم پارتی) لە هەژماری خۆی لە تۆڕی کۆمەڵایەتیی ئێکس پەیامێکی لەبارەی دۆخی حەلەب بڵاوکردەوە و نووسیویەتی: هەندێک کەس ساڵانێکە بە گوتنی با کورد لەنێوبەرین، ئەم وڵاتە و خۆشیان هیلاک کردووە.
رەخنە لە بێدەنگیی سووریا بەرامبەر ئیسرائیل
پەرلەمانتارەکەی ئاگری رەخنە لە بێدەنگیی حکومەتی سووریا بەرامبەر ئیسرائیل دەگرێت و دەڵێت: ئێستا جیهادییەکان و سوپای سووریا، دوو گەڕەکی گەمارۆدراوی کوردی لە حەلەب بە چەکی قورس بۆردوومان دەکەن، بەبێ جیاوازی منداڵ و خەڵکی مەدەنی کۆمەڵکوژ دەکەن، لە کاتێکدا ئیسرائیل گەیشتووەتە دووریی 10 کیلۆمەتری دیمەشق، بەڵام ئەوان فیشەکێکیشیان بە ئیسرائیلەوە نەناوە.
هۆشداری لە شەڕ و خوێنڕشتنی زیاتر
ساکک هۆشداری دەدات لەوەی ئەم رێگەیە شەڕ و خوێنڕشتنی زیاتری لێدەکەوێتەوە و دەڵێت: جگە لە ئاشتی، هەموو بژاردەکانی دیکە سەرجەم گەلان بەرەو دۆزەخ رادەکێشن.
ئاماری قوربانییەکان لە سێ رۆژدا
لە رۆژی سێشەممەوە سوپای سووریا هێرشی چڕی کردووەتە سەر گەڕەکە کوردنشینەکانی حەلەب. بەگوێرەی ئاسایشی حەلەب، لە ماوەی سێ رۆژدا 8 کەس گیانیان لەدەستداوە و 57ی دیکەش بریندارن.
خۆپیشاندان لە شارەکانی باکووری کوردستان
هێرشەکان کاردانەوەی لێکەوتەوە و شەوی رابردوو لە شارەکانی ئامەد، ئێلیه و وان لە باکووری کوردستان گردبوونەوە و خۆپیشاندان بۆ پشتیوانیی کوردانی حەلەب بەڕێوەچوو. ئەم خۆپیشاندانانە نیشانەی هاوسۆزی و پشتیوانی گەلی کورد لە هەموو بەشەکانی کوردستان دەدەن بۆ برا و خوشکەکانیان لە حەلەب.
