بەرپرسێکی بەڕێوەبەرایەتیی خۆسەر: دیمەشق نایەوێ رێککەوتنی 10ی ئادار جێبەجێ بکات
ئەندامی دەستەی پەیوەندییەکانی دەرەوەی بەڕێوەبەرایەتیی خۆسەر پەیامەکەی سەرۆک مەسعود بارزانی لەبارەی هێرشی سوپای عەرەبیی سووریا بۆ سەر گەڕەکە کوردنشینەکانی حەلەب بە هەڵوێستێکی نەتەوەپەروەرانە دەزانێت. ئەو رایگەیاند کە لەگەڵ لایەنە پەیوەندیدارەکان لەسەر هێڵن بۆ ئەوەی هێرشەکان رابگیرێن.
سوپای سووریا لەبری پاراستنی خەڵک هەوڵی قڕکردنیان دەدات
رۆژی چوارشەممە، 7ی 1ی 2026، خالید ئیبراهیم، ئەندامی دەستەی پەیوەندییەکانی دەرەوەی بەڕێوەبەرایەتیی خۆسەر لە کاتی بەشداریکردنی لە بووڵتەنی کاژێر 19:00ی تۆڕی میدیایی رووداو کە نالین حەسەن پێشکێشیکرد، لەبارەی هێرشەکەی سەر گەڕەکە کوردنشینەکانی حەلەب رایگەیاند کە سوپای عەرەبیی سووریا لەبری پاراستنی خەڵک، هەوڵی قڕکردنیان دەدات.
ئەمڕۆ سەرۆک بارزانی لە پەیامێکدا هۆشداری دا کە ئەو شەڕ و تووندوتیژییەی لە گەڕەکەکانی شێخ مەقسوود و ئەشرەفییەی حەلەب دەگوزەرێت، هەڕەشەی جیددیی پاکتاوی رەگەزی لە دژی گەلی کورد لەو ناوچەیە دروستکردووە.
پەیامی سەرۆک بارزانی هەڵوێستێکی نەتەوەپەروەرانەیە
خالید ئیبراهیم ئاماژەی بەوە کرد کە پەیامەکەی رێزدار بارزانی جێگەی دڵخۆشییە و هەڵوێستێکی نەتەوەپەروەرانە و کوردستانییە، کە دەستی هاوکاری درێژکردووە بۆ ئەوەی ئەو شەڕە گەورەتر نەبێتەوە.
بەگوتەی ئەو ئەندامەی دەستەی پەیوەندییەکانی دەرەوەی بەڕێوەبەرایەتیی خۆسەر، هێشتا دەرفەت بۆ گفتوگۆ و دانوستاندن ماوە. بەڵام چوار رۆژ لەمەوپێش هێشتا شاندی هێزەکانی سووریای دیموکرات (هەسەدە) لە دیمەشق بوون کە بەداخەوە لەلایەن حکومەتی سووریاوە هەڕەشە لە شێخ مەقسوود و ئەشرەفییە دەکرا.
بەڕێوەبەرایەتیی خۆسەر لایەنگری ئاشتە و دیالۆگە
خالید ئیبراهیم جەختی لەوە کردەوە کە ئێمە لایەنگری شەڕ نین، بەڵکو ئاشتیخوازین و دەمانەوێت هەموو شتێک لە رێگەی دیالۆگەوە چارەسەر بکرێت. بەڕێوەبەرایەتیی خۆسەر لەگەڵ هەموو لایەنە پەیوەندیدارەکان لەسەر هێڵە، بۆ ئەوەی ئەم گوشارانە لەسەر خەڵکی شێخ مەقسوود و ئەشرەفییە نەمێنن.
رێککەوتنی یەکەمی نیسان و ئاماژە بە هێزەکانی ئاسایشی ناوخۆ
لە یەکەمی نیسانی 2025، حکومەتی سووریا و بەڕێوەبەرایەتیی خۆسەر رێککەوتنێکیان لەبارەی گەڕەکەکانی شێخ مەقسوود و ئەشرەفییە واژۆکرد. ئەو ئەندامەی دەستەی پەیوەندییەکانی دەرەوەی بەڕێوەبەرایەتیی خۆسەر رەتیدەکاتەوە کە هێزەکانی هەسەدە لە گەڕەکەکانی شێخ مەقسوود و ئەشرەفییەدا مابن و دەڵێت بەگوێرەی رێککەوتنی یەکەمی نیسان تەنیا ئاسایشی ناوخۆ لەو دوو گەڕەکەدا ماون.
خالید ئیبراهیم جەختی لەوە کردەوە کە بەردەوامبوونی شەڕەکە لە بەرژەوەندیی هیچ لایەنێکی سووریادا نییە و زیانێکی گەورە بە سەرجەم گەلانی وڵاتەکە دەگەیێنێت.
دیمەشق دەیەوێ ناکۆکی بخاتە نێو پێکهاتەکان
وەک ئەو ئەندامەی دەستەی پەیوەندییەکانی دەرەوەی بەڕێوەبەرایەتیی خۆسەر دەڵێت، دیمەشق دەیەوێ ناکۆکی بخاتە نێو پێکهاتەکانی ناوچەکانی ژێر دەسەڵاتی بەڕێوەبەرایەتیی خۆسەر بۆ ئەوەی شەڕێکی نێوخۆیی دەستپێبکەن. بەڵام گەلی ئێمە بە هەموو پێکهاتەکانی وەک کورد، عەرەب و سریانییەوە هۆشیارە و دەزانن دەستکەوتەکانی خۆیان چۆن بپارێزن.
رێککەوتنی 10ی ئادار و گلەیی لە جێبەجێنەکردنی
رۆژی 10ی ئاداری 2025، رێککەوتننامەیەکی 8 خاڵی لە نێوان مەزڵووم عەبدی، فەرماندەی گشتیی هێزەکانی سووریای دیموکرات و ئەحمەد شەرع، سەرۆکی سووریا بۆ قۆناخی راگوزەر واژۆکرا. خالید ئیبراهیم گوتی ئێمە وەک بەڕێوەبەرایەتیی خۆسەر و هەسەدە ئامادەین بۆ جێبەجێکردنی سەرجەم خاڵەکان، چی سەربازی، چی مەدەنی و تەنانەت پرسی نەوت و گازیش، بەڵام بەو مەرجەی هەموو خاڵەکان پێکەوە بن.
ئەو ئەندامەی دەستەی پەیوەندییەکانی دەرەوەی بەڕێوەبەرایەتیی خۆسەر دەڵێت بەداخەوە حکومەتی شام نایەوێ رێککەوتنەکە وەک خۆی جێبەجێ بکات و دەیەوێت تەنیا هەندێک خاڵی سەربازی جێبەجێ بکرێن بەبێ رەچاوکردنی مافەکانی دیکەی گەلەکەمان. چونکە یەکێک لە خاڵەکان راگرتنی شەڕ لە سەرانسەری سووریا بوو، بەڵام ئێستا هێرش دەکرێتە سەر شێخ مەقسوود و ئەشرەفییە.
شەڕی قورس لە حەلەب و قوربانییەکان
لە رۆژی سێشەممەوە، 6ی 1ی 2026، شەڕێکی قورس لە شاری حەلەب لە نێوان هێزەکانی ئاسایشی ناوخۆ و سوپای عەرەبیی سووریا دەستیپێکردووە، هەردوولا یەکدی بە دەستپێشخەری تۆمەتبار دەکەن.
بەگوتەی نووری شێخۆ، هاوسەرۆکی ئەنجوومەنی گەڕەکەکانی شێخ مەقسوود و ئەشرەفییە بۆ رووداو، تاوەکو ئێوارەی ئەمڕۆ چوارشەممە، 8 کەس گیانیان لەدەستداوە و 48 کەسی دیکە بریندار بوون. ئەم ئامارانە نیشانەی قووڵایی ئەم پێکدادانە دەدەن و مەترسیی زیادبوونی قوربانییەکان هەیە ئەگەر شەڕەکە بەردەوام بێت.
